How to install Cpanel

تحت تصنيف cpanel, sysadmin بواسطة admin

هيه دنيا

ياله بقي نبدأ

هنقول السلام عليكم

وعليكم السلام من اولها هتلك ايه ياعم انت معندكش غير كلام متورينا اي حاجة مفيدة

تصدق انك بتستعجل علي رزقك انهرده ياعم هنشوف ازاي هنركب الCpanel علي السيرفر بتاعك

طيب هتيجي تقولي هوه انا عارف يعني ايه cpanel اصلا اقولك انا :

الCpanel دي لوحة تحكم بتكون في الموقع بتاعك بتقدر تعمل بيها كل حاجة طبعا لو عاوز تعرف ايه هيه عندك الجوجل واتعب نفسك شوية واعمل سيرش عليها

طيب ماشي ياعم هنسطبها ازاي علي السيرفر وياتري دي صعبة ولا ايه

لا صعبة ولا حاجة كل اللي هتحتاجه انك هترخص الIPبتاع الموقع بتاعك اللي هوه هيكون ان شاء الله الNS1بتاعك

هترخصه من موقع السي بانل يعني هتدفع ثمن النسخة امال هيه سايبة ياعم دي حقوق ناس

طيب ارغي ياعم بس طالما اترخص الip خلاص بقيت سهلة وبسيطة قوي

طيب لو انا مش رخصت النسخة للip هل ينفع اني اسطبها اه ينفع وممكن تاخد رخصة تجريبية لمدة 15 يوم يعني تجرب وتشوف

هما مش فاتحينها تكية ليك تبرطع فيها براحتك

طيب ياله بقي نبدأ

1- ادخل الSSH زي الباشا root

2-نصيحة كل ما تيجي تشتغل علي حاجة او تسحبها من بره تنظمها كده وتخلي شكل السيرفر مرتب هوه مش ديسكتوب عندك في البيت

يعني ايه ؟

يعني تعمل فولدر وتحط فيه حاجاتك زي كده

mkdir /home/cpins

3- تدخل علي الفولدر اللي عملناه من شوية

cd /home/cpins

4-تروح تسحب بقي الملف بتاع السي بانل اللي هيسطبها من الموقع بتاعهم

wget http://layer1.cpanel.net/latest

5- نروح بعد الملف ما يتحمل ويخلص ويقولك تمام اشطات نشغله

sh latest

كده بقي تنتظر لغاية لما السي بانل تخلص هيه مع نفسها تحميل كل حاجة وشكرا  شوفت بقي العملية بسيطة ازاي

6- كده دور الssh انتهي  هنروح بقي للIP اللي انت مرخصله الcpanel

http://xxx.xxx.xxx.xxx:2086

وهتكمل بقي باقي الاعدادات ودي ليها موضوع لوحدها ان شاء الله هينزل قريب

ياله بقي مش عاوز حد يقولي دي صعبة ولا بتنجان

اللي عاوز يعرف معلومات تاني علي الCpanel او عاوز يزودها يدخل هنا

http://www.cpanel.net/docs.htm

http://www.cpanel.net/install.html

يلا بقي الحقوا اهربوا

سلام